وجوه من الداخلة: محمود ابو بكر

مواليد 26\6\1928

: من اكابر بلدة القصر بواحة الداخلة

كان يعمل طباخ عند خواجة سوري ومن اوائل السكان الذين هجروا البلدة القديمة

عمل بسوريا ولبنان قبل الثورة ثم استقر يعمل بالكويت

عن بيوت القصر القديمة

للاسف الناس ماحفظوش النعمة ديه ولفظوها وفرحوا انهم نزلوا في الخلا لكن ايام البيوت القديمة ماحدش اشتكى بمرض او بوجع راس او بلامؤخذة بمغص ولا سكر السكر ده ماكناش نعرفه الا انه السكر بتاع الشاي يعني كان فيه بعض الحشرات المؤذية زي العقرب وبتاع ولكن ماكنش يأثر في الأنسان يعني حاجه عادية. كانت الناس تحب بعضها وكان فيه هناوة في الأكل وفي الشرب اصل الطوب الني دي له حكاية مع الانسان لان الأنسان مخلوق من ايه؟(رددنا نحن الثلاث في وقت واحد : من طين !) آه وخلقنا الأنسان من سلالة من طين) طبعا كل شيء يحن لاصله ومادام البني آدم معمول من طين يحن للطين اللي بتتعمل منه البيوت لذلك تلاقيه حنين في كل حاجة وده اصل البني آدم في الشتى والبرد تلاقيه يديلك دفء وفي الصيف والحر يديلك براد الأسمنت ده مادة غريبة ، احنا عمرنا ما كنا نسمع عن السمنت ده خالص ولا نتعامل معاه ولا جدودنا يعني جدودنا دول لو كانت اجسامهم ترتاح للاسمنت كانوا عملوا منه كل حاجة كانت كل شيء رخيص، كان بتراب الفلوس كانت شكارة الأسمن ب2 جنيه. كل سنة في البيت القديم كنت بجدده بشوية طين وميه بس الناس نقلت لجل التمدن مع ان في البيت القديم ماكنش حد يشعر بمرض ولا يروح لدكتور ليه لان الجنس بتاعه حنين عليه، ماكناش نعرف مكان دكتور والست كانت تولدها الداية الحركة الطلع والنزول في البيت القديم العيل ينزل من غير ما أمه تشعر، انما دلوقت اول ما تحمل الست الحق الدكتور يتابع الدكتور عدد شهور الحمل لغاية ماتولد يكونوا صرفين على العيل 3 \ اربع آلاف زمان ماكنش كده كانت الست تحمل عشرين بطن تمانية سبعة وتربيهم وتعلمهم كده. القصر ده مبنية على اساس علمي وعلى اساس تكييف مركزي لما تدخلي في وسط البلد وتمشي فيها حتلاقي اماكن مسقوفة واماكن زي المنور ديه وانت جيه من الغيط وانت جيه من الخلا ديه تلاقي درجة الحرارة يمكن توصل لحد اربعين لما تدخلي وتمشي في وسط البلد تلاقي براد وهوا بارد مكرر لاني ابني البيت بتاعي هنا وانت تبني البيت بتاعك هنا ونسيب حته فراغ ما بينهم ونعلي الحيطة القبلية والهوا يجي من بحري الهوا يجي يخبط في الحيطة ديه ويقوم نازل ايه في الشارع على بال ماتوصلي للبيت وانت جايه من الغيط من الصحرا وحر تحسي بالبراد

سكان القصر الأوائل

لا ازاي ده فيه ناس وسلالتهم عايشة لحد الأن اللي هما سكان الواحات الأصليين ، اللي هما عيلة الجندي وعيلة الكجة ( أحنا كنا نجيب العشا ولله) دول الناس الأصليين بتوع الواحات، من الاربعينيات كان جم ناس تستكشف مين هما هل الواحات واعدوا يبحثوا واكتشفوا ان دول اهل الواحات الأصليين، انما الناس اللي جت بعد كده جت غازية في القصر تشوفي البوابات في الشارع، كل حارة ليها بوابتين (من الخشب الكبيرة) في الاول والأخر تقفل بواباتها بالليل محدش يستجري يخش وبعدين كان فيه حراس يقفوا زي فرندة كده يحط فواهة البندقية علشان لو غازي جه يكسر البوابة الاصل دول ماحدش يعرف اصلهم، اللي جم من بره وغزوا واعدوا جم من السعودية دول الجراشية من بني قريش اصلهم والشرفة اللي اصلهم من نسل سيدنا الحسين فيه ناس تانين اسمهم الشهابين برضه اعدوا هنا واستوطنوا وعملوا املاك الشهابية دول جدهم واحد اسمه الشهاب بن مغارق بن راس الغول وقتل الأمام علي كان كافر، دول جم من منطقة اسمها دينار مش عارفين اصلها فين واسم العيلة الدينارية ـ الجزارين دول اللي هم جم من الساقيا الحمرا في تونس، ومن ذلك الدينارية دول كان ينظموا الشعر كانت هنامسابقة بين القبائل لردم  ترعة والدينارية وحدهم اللي عرفوا يردموها ونظموا شعر (يسترسل في القاء بعض البيات)

فين كلامك يابابا اللي جلتلي بالتأكيد وتجوله جوا البوابة وتجراه عليا وتعيد

احنا نرسيها على ما ترسي واحنا نصيد كل عنيد

اليوم نكملها ويوم تتم وتبجى عيد

نسلمها لباشا وحكيم يجيب مأمور يعاين فيها باتوموبيل

يزيلها ولاد فرسان ونجول دوس العالي دوس

وياما ضاعت فيها اموال واتسكر ياما وتكسر فيها فؤوس

بجى يجري فيها الخيال بعد ماكان يعوم فيها الجاموس

عن والده والحياة في البلدة القديمة

نزلت من البلد اريب بس انا اول واحد نزل منها كنا سبع اخوال والوالد الله يرحمه كان زي السيف يبص للواحد يترعب، كويس وحليم وحنين ماكنش يحب الحرام قبل مانخرج يدينا درس ، والدي اصلا كان شيخ يقرأ القرأن ، يأذن ويصلي كان غفير واترقى لشيخ غفر ووصل لغاية 77 سنة وتوفي سنة 1963 وكان عنده المضيفة اي واحد يشوفه في الشارع غريب لازم يجيبه البيت، المضيفة جنب البيت الضيف ياخد يوم، يومين 3 ياكل ويشرب. لغاية ما يخد حاجته من البلد ويمشي. لان القصر ديه كانت أصل الصناعة الحدادين البناين من القصر جميع المهن كانت من القصر. كل الناس كانت تبع قبيلة، حتى الناس اللي بره القصر كانوا من القصروليهم بيوت جوه بس عشان اشغالهم بره بنوا بيوت بره بلاط، المعصرة، الموشية، قلمون، موط كلها قرى كان ليهم أساس في القصر لكن مع التطور بقى الواحد يبي بره علشان يبقى قريب من الأرض والميه بتاعته والعيشة كان يوم الجمعة الناس تأتي من العزب ديه للقصر اللى عايز يصلح الفاس بتاعه، عنده ببان/طاحون /ساقية عايز يعملها …الخ كانت الناس تيجي يصلوا الجمعة ويقضوا مصالح ، عايز يشتري قماش، أكل أي حاجة يجي القصر يبيع يشتري والدي الله يرحمه كان يقعد بره الجامع ينتظر الناس الغريبة اللي مالهمش بيوت هنا وجه ميعاد الغذاء فكان يبعتنا نجيبهم على المضيفة يصلوا ويتغدوا وتمام تمام ويروحوا ماشيين.

حياته المهنية

أتأممت املاك الخواجة بعد الثورة (كان خواجة سوري) عزبة في المنصورة وعزبة في المنيا وكان له شريك واحد مصري محمد نور سالم، كنت طباخ وتجيلى الحاجات من عزبة المنيا كنت ساكن في ميدان التحرير ادام الأنتكخانة. بعد كده انا جيت من سوريا كانت فيه هيئة تعمير الصحاري آخر الخمسينات، اشتغلت طباخ قالي اختبرك اسبوع نجحت أتعينت مانجحتش حاتمشي من غير ولامليم، عملي اختبار كان معايا ستة طباخين، عشان اطبخ ل46 مهندس في الأستراحة ديه (كانت هذه الأستراحة مبنية للملك فاروق) سرح الطباخين وقالي انت تفطر المهندسين وتغديهم وتعشيهم حاديهم يوم الخميس والأثنين لحمة وباقية الأسبوع اتصرف ومعايا واد يساعدني اجيب حاجات من السوق بيض .. الخ وانا كنت اعرف ناس كويسيين يجيبولي البيض والحمام. بتاع الهيئة ديه ادالي الفلوس. الحمد لله ربنا وفقني ال8 أيام. كان المهندس من دول يجيلي على المطبخ والتاني والتالت يعملوا لي زحمة قلت ما ينفعش قلت اعملهم نظام وسفرة (32″10). لما نجحت في الأختبار وكانت ليها لجنة سلموا لي الأستراحة ديه بتاعة الملك فاروق، كان السياح ينزلوا فيها اصل ماكنش فيه لوكاندات غير الأستراحة ديه. في الفترة ديه كنت اشتغل في موط واجي كل اسبوع. بعد اختبار اللجنة قالولي “ماكناش نعرف طعم الأكل الا من ايدينه خلاص ياعم نعين ” الكلام ده كان الساعة خمسة روحت البيت لقيت واحد جايب جواب فيه عقد بتاع الكويت. رحت الكويت كل سنتين انزل اخد اجازة كنت طباخ في هيئة التربية والتعليم. سنة 1963 خدت 22 سنة اشتغل في هيئة التربية والتعليم من 63 ل 87 كنت ارجع في المدارس، كنت ارجع الائي البلد مش متغيرة اصل البلد الاديمة كان فيها حب واحترامات ما كنش زي دلوقت في الأول كان الجيران ماحدش يقدر يعمل فرح من غير ما يستأذن من اهل الميت ويستى لغاية عيد بتاع الاضحية يجيي يقول فلان انكسرت عليه عضمة الضحية يالا اتجوز دلوقت ماعدش فيه جيم ولا اخلاء يبجى الميت كده والفرقة كدا، انا كنت عايز اجوز اخواتي وكان فيه ميت على بعد 8 كيلمتر ابويا جال لا التلوا يابويا … جالي لا لازم يكون فيه هناك احترام يعني ايام مواسم الفواكه والحاجات ديه انا عندي ادي للي ماعندوش ماخايش ابني يطلع بره شايل الحاجة عشان ولاد الجيران يشفوها ومايكنش عندهم لذلك “ان الله لايغير ما بقوم حتى يغيروا ما بانفسهم لما النفوس اتغيرت المايه كنتي تحفري في الأرض المايه كانت نفورة توصل لمترين تلاتة، كان عندنا هنا في القصر المايه ديه كانت بحور، تمشي على بعد 7 كيلو تسمعي الهدير بتاعها 39”

الحياة في الغربة (في الكويت)

كان فيه شقة فيها فوق ال17 نفر ماكنش حد يقدر ياكل بلحة او تفاحة من غير التاني، انا كنت لما اعمل حفلة في اخر الحفلة يديلي خروف خروفين، فواكه بالقفص والموز بالقفص اجي احطهم في العربية بتاعتي واروح والله العطيم تكون الساعة 3 نايمين اللي في الشقة اخبط اصحي الكل الي ياكل تفاح واللي ياكل لحمة واللي ياكل رز يتعمل الشاي بعدين نلبس ونروح على الشغل، فلان عيان في المستشفى ندور نلف على كل الناس نلم، فين دلوقتي الحاجات ديه دلوقتي الأخ ما يشوف اخوه . المصيبة ان الجيل اللي طالع جيل صعب ، كانت زمان الستات تاكل لوحدهم كان ممنوع تقعد مع الرجالة. الوالد كان يعترض على تعليم البنات، يعني عندي بتي الكبيرة كانت الأولى في المدرسة واخوي مدرس، وطلعت الأول ومتفوقة وخلصت الستة سنين الابتدائي وكانت حتخش إعدادي، وعمل أبويا عمل الورق سر ، لبنتي وبنت احويا، ولدي راح ضرب اخويا في وسط المدرسة قلع الجزمة وضربه ازاي ماعندناش بنات تتعلم وتروح المدرسة.

وعن محاولة استرجاع البيوت القديمة من هيئة الآثار….

بقولك اسرائيل عم بتدي حقوق!!! اشتكينا لهيئة الأثار ولا حد رد علينا ..

كل ما الوقت ما يطول يقطعه نفس الجملة “يا اهلاً وسهلاً …شرفتونا وانستونا يامرحب

ا ،

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s